Следете го патот на виното
Земете здив од напорното секојдневие и поминете четири дена во Гарден Спа бутик хотелот и со нашите пријатели на исконскиот македонски „Пат на виното“ низ тиквешијата и во струмичко.
Три ноќевања со појадок, посета на најдобрите и најуспешни македонски винарии, и дегустација на врвни вина и локални гастрономски и традиционални специјалитети. И единствена шанса да ги користите содржините на нашиот вински спа центар во новиот хотел Гарден спа, кој е единствен во регионот.
Прв ден
Претпладне тргнување кон винаријата Тиквеш во Кавадарци. Прошетка со водич и запознавање со најголемата винска визба во југоисточа Европа. Обиколка на тиквешовите лозови насади Домеин Лепово и посета на манастирот Свети Ѓорѓи во Неготино. Дегустација на врвните вина на Тиквеш.
Лозовите насади Лепово се наоѓаат на 100 км. јужно од Скопје и 7 км. од градот Неготино и Винарската визба Тиквеш. Насадите се на надморска висина од 180 метри во месноста Црвени Брегови. Уште од антиката, овој регион со своите климатски карактеристики се смета за најидеална почва за винската сорта грозје Шардоне. Лозовите насади се наоѓаат на патот кој ги поврзувал античките градови Антигонеа и Стоби.
Следејќи го патот на виното низ највинскиот регион во овој дел на Европа, во раните попладневни часови е планирана посета на винаријата Стоби, во малата но симпатична општина Градско, на бреговите на реките Вардар и Црна, и непосредно до античкиот локалитет Стоби. Од тука винаријата Стоби и го добива своето име.
Тоа е нова и модерна македонска винарија која во своите уникатни вина го пренесува искуството на генерации локално население кои на оваа дарувана почва го одгледувале најдобро грозје, и од тука доаѓа посветеноста за создавање врвни модерни вина. Во објектот на винаријата Стоби ќе биде послужен ручек со традиционалната македонска гастрономска кујна, заедно со дегустација на нивните наградувани вина.
При враќањето кон Скопје во вечерните часови, на кратко ќе одмориме во Вила Бела, во неодоливиот подпланински пејсаж наречен Моклиште, во близина на Кавадарци. Тука со големо задоволство ќе ве запознаеме со традиционални но денес исклучително ретките гроздови производи, како што е „маџун“ (екстракт на гроздов шеќер со неповторливи хранливи карактеристики и магични природни лековити својства) и со неодоливото „рачели“, слатко задоволство од тиква и маџун. И со неизбежното македонско кафе.
Вечерта на располагање и релаксација ви стои спа центарот во хотелот Гарден спа, со целосно органски препарати на база на грозје и вино за третмани на лице и на тело (пилинг, масажи и стручна помош од нашите козметички специјалисти). И доцнавечерно опуштање со големиот избор на вина од нашиот хотел.